WST Steelband Panorama 2019 logo


For more on Steelpan In TnT click here

Trinidad & Tobago Panorama 2019 - HOME

  Bookmark and Share

‘Pan From Heaven’

sung by George Rampersad
composed by George Rampersad

Click for list of 2019 songs

What are your thoughts on this song?
Click to leave an opinion...

“Pan From Heaven”
George Rampersad
Provided with the expressed permission of the composer(s)

click here for lead sheet

LYRICS

Verse 1

I went to Notting Hill carnival up in England
Dey tell mih dat London have ah lot of sweet pan
Donkey years now I is ah fan ah de steelband
Play pan in Europe, the U.S. and Caribbean
Standing dey on ah corner, some fellas running dey hand
Ah fold mih arm an ah lean up against ah wall
When yuh hear de arranger check tuh four an count in de band
Dat is when ah put mih hand over mih head and bawl

Chorus 1

Doh beat dem pan, bredder ah beg yuh
Doh beat dem pan, pan eh de enemy
Doh slam dem pan, no, no, no
Doh ram dem pan, just touch it so
Pan is not Good Friday bobolee
Pan is ah gift from heaven
Sent down by Jah Jah tuh Rainbow Island
And everyone got tuh show de steelband
A little love an respect
I come to you with dis message
My dear pan ladies and pan gents
Show some love an respect fuh de instrument

Verse 2

I know ah panman he livin in Tunapuna
Every night when de fella walk in de yard
De players know dat de tenor pan is in danger
He slammin it up an tellin people he bad
De captain warnin de fella, de arranger threatenin tuh leave
Everybody talk tuh de boy fuh so many years
Ah check out de section leader wit he finger inside he ears
He tell mih George, boy dis man is rell tears

Chorus 2

He say doh beat dem pan, bredder ah beg yuh
Doh beat dem pan, pan eh de enemy
Doh slam dem pan, play it sorf
Doh ram dem pan, stop showin off
Pan is not Good Friday bobolee
Pan is ah gift from heaven
Sent down by Jah Jah tuh Rainbow Island
And everyone got tuh show de steelband
A little love an respect
He tell me to bring dis message
My dear pan ladies and pan gents
Show some love an respect fuh de instrument

Verse 3

De captain carry de tenor pan by de doctor
Penta watch it an started shakin e head
If allyuh did only wait ah little bit longer
I would have tuh pronounce dis instrument dead
He wuk two days on de tenor, den he call de captain an say
How tuh tune dis instrument only God alone knows
Dem big dent on de F-sharp, B-flat, E-flat and A
Dis pan been takin ah big overdose ah blows

Chorus 3

He say doh beat dem pan, bredder ah beg yuh
Doh beat dem pan, pan eh de enemy
Doh slam dem pan, do not beat
Doh ram dem pan, play it sweet
Pan is not Good Friday bobolee
Pan is ah gift from heaven
Sent down by Jah Jah tuh Rainbow Island
And everyone got tuh show de steelband
A little love an respect
Penta give me dis message
My dear pan ladies and pan gents
Show some love an respect fuh de instrument

Verse 4

One night ah went tuh ah night club in Copenhagen
De famous Two Left was due tuh play on de show
People pack up de place tuh hear dis great panman
Tuner, arranger, steelband virtuoso
As soon as dis master panist walk on stage an started tuh play
De place get silent people sitting amaze
Ah female music professor turn tuh me an she say
Dis man has taken de pan tuh ah higher phase

Chorus 4

She say he play dem pan like it was ah baby
Softly, gently, sweetly and tenderly
When he improvised, she was mesmerized
She say he made her feel so heavenly
He know it’s ah gift from heaven
Sent down by Jah Jah tuh Rainbow Island
An Two Left is one who bring de steelband
Ah lot of love an respect
He send mih here with dis message
My dear pan ladies an pan gents
He say love an respect allyuh instrument, Two Left say
Show some love an respect fuh de instrument




Visit When Steel Talks