According to de ole kaiso "Ah wasn dey, Ah wasn dey" but ah
still see it an hear it doh. If yuh see me. I in meh duster,
two pair'ah socks, vicks all up nearly in meh pweffen. Ah
coughin an sneezin an watchin dat gawdforsaken snow fallin
outside as if to say 'Yuh wretch! Yuh born in a nice warm
country an still yuh take yuh farse self an migrate to
Icebox Land? Now watch. Is carnival in T&T an you stick up
so wid a cole an fever. Cyah even buss open a Carib self.
Yuh radio stations only playin "Put A Ring Inside It" an de
Best Of De Moron Tabaracle Choir. It good fuh yuh!"
Meh macoomere call meh an give me de internets link to CTNT
World so ah could watch de Panorama. By de time ah titivate
I did done miss Sound Setters an most of Exodus. Ah come in
time to hear de last 4 bars but ah settle mehself to hear
toute monde after dat.
Well all yuh done know meh mout have no lock when it come to
Toronto's Pan Alive an pan in general. Ah does get boof back
belly an side but ah does talk meh mine because as far as I
see it, Pan belongings to me. Is mine, I born it, meh nabel
string bury under it, it in meh blood, meh head an meh DNA.
When ah dead ah coming back as a bass pan.
Ah doh really talk bout T&T Panorama because ah doesn't get
to travel to see it personal but dis year ah get a capriche
to see it on de people computer.
Hear meh lyrics.
I born rong de corner from La Coeur Harpe. Meh fadda did
play double tenor fuh Renegades. Sometimes he would teef me
from meh mudda an park me on top two pan while he
practicing. Ah meet Mr. Samaroo an nearly all dem panists.
On occasion meh cousin would take me dong by Despers to hear
dem. A time ah went up John John an pan jumbie hole me when
Solo Harmonites leggo some chunes. Ah went troo Invaders
panyard. Yuh remember Casablanca? Ah was dey too to hear.
In dem days Ma wasn letting she girl chirren play no pan. It
wasn till ah get big dat ah get chance learn. Den meh
gawdmudda learn meh how an what to listen to an for. So now
as ah reach woman ah have a clue.
While Panorama 2009 was going on ah was makin notes. Ah
listenin fuh intro, verse, chorus, arrangement, outro. Ah
watchin delivery an presentation. Is troot due to de
internets feed ah couldn't get de clarity ah wanted but ah
still give marks as bes as ah could.
CTNT had a ligaroo in dey tail dat night because dey lorse
de sound fuh at lease tree bands intro. Ah miss Silver Stars
intro, Renegades intro and Delltones intro. Den when Mr.
Alvin Daniel was giving de Special Moments recap, CTNT lorse
de sound again. It was as if dey trying to lan me in a mad
house. But ah persevere. Mistress Joslynne Carr-Sealey an a
nex lady who ah din know was commentating along wid Mr.
Daniel. Den later Mr. Wright do a recap.
When ah hear Mr. Wright give top marks to Despers ah run
quick to get a qtip to clean out meh ears. Despers? Nah! Dat
cah be right. I doh have meh PhD in Pan an ah doh teach
anywhere exceptin in Commess University, but Despers intro
was sluggish an to me dey play de whole chune a lil too
slack to compare to de ress.
Ah wonder if is de same Mr. Wright who handle Pan Alive? If
so, den ah ress meh case. Ah not able.
When Silver Stars play ah say to mehself "Lawd is You who
make pan an tonight Yuh anoint Silver Stars". Den when ah
hear Phase II ah say it go have ruction. Dey go have a noise
dis year. Since ah din hear Silver Stars intro, ah had Phase
II ahead by 1 point. My results at de end was - Phase II,
Silver Stars, Delltones, All Stars, Renegades, Despers in
dat order. It wasn till de next day in listenin to a T&T
radio station dat ah hear Silver Stars intro.
Well Mr. Pouchette if I was dey I would shake yuh han yes
boy. Ah see why yuh ban win an if I did hear dat intro de
same night I wudda have you in front by more dan jes one
point. Yuh wudda get a full 2-3 points on top. Yuh flavor de
piece wid a intro dat make people realize in a flash dat
what comin nex go mash up de cazbah. Yuh pay out de rope lil
bit lil bit an we hole it den yuh bus de verse an chorus an
had we in space. Yuh players look like dey had a ball an as
simple as dat is, it does energize de air an give de whole
delivery a fresh feel.
Each pan section had a voice. Yuh had a call an answer.
Sometimes arranger does overdo de tenors an seconds. We all
know de tenor is borse an could carry a chune all over de
place an come back but yuh allow all man to hole dey own in
dat arrangement. Ah fine too, a piece dat let de bass an
cello shine does grip meh more. Yuh see dem underneat
sections? Is dem who hole'in de heartbeat of a chune. Yuh
cah live widdout a heartbeat an de stronger yuh heart is, de
more yuh body does enjoy life. All de pretty tenor it have
does be like lipstick an a new high heel shoes but dat
heartbeat have to be strong.
Silver Stars, big up! Yuh deserve yuh win!
Now lemme take a tun in Renegades tail.
When I leave home to come in dis cole, dry, riddim-stricken
place all yuh was on top year after year. So whappen now?
*steupse*
Ah takin dis personal, man. All yuh have me feelin ahow up
here.
Where de ban I know who play "Pan In A Minor" an had Papa
Gawd bawlin? In Panorama 2009 ah had meh toes, meh arms, meh
eye an meh plaits crawse fuh all yuh. All I hear was a slack
regurgitation of years gone by. Even doh it was a tribute to
de brilliance-ness of Mr. Jit ah fine it lack de sparkle. It
was not a fitting tribute to ah arranger who carry all yuh
to de top of de mountain! Yuh hurt meh bad. Ah want to see
all yuh come back. Dis business of comin all kine'ah 5, 6 an
7 not right fuh MY Renegades! All yuh stop makin joke nuh
man!
Anyway, lemme hush before ah get boof again oui.
Ah have no argument wid de judging in T&T's Panorama 2009.
Congrats to all an ah hoping to be dey in front nex year.
Walk Good
Queen Macoomeh
Self Appointed Mouter
click to leave an opinion
Queen
Macoomeh
Click for related articles
|